FABIO CAPELLO OO XULASHADIISII KA TEGAY DEVID BECKHAM

Macalinka dhalashadiisu tahay Talyaaniga ee Fabio Capello ee loo dhiibay 12kii December 2007 macalinnimada dalka Ingriiska, si uu u layliyo xulka Qaranka kubadda cagta dalkaas ayaa maanta oo bishu ahayd 31/01/08 ku dhawaaqay xulashadiisii koowaad ee uu ku kala dooranayay cayaaryahanada u safan doono cayaarta ku soo food-leh ee ay la yeelan doonaan xulka Qaranka Switzerland.

Waxaa beryahanba la hadal hayay in uu xulashadiisa ka tegi doono iyo in kale laacibka wayn ee lagu magacaabo Devid Beckham oo aad ugu baahnaa in uu mar kale ka mid noqdo Qaranka dalkiisa si uu u buuxiyo cayaartii boqolaad ee uu u safto dalkiisa.

Devid Beckham oo hada u cayaara koox Maraykan ah oo lagu magacaabo LA Galaxy ayaa kooxdiisii ay ku jiraan nasasho. Wuxuuna bishaan tababar la qaadanayay kooxda Arsanal ee ka dhisan dalka Ingriiska si uu firfircoonidiisii u lumin. Runtiina sababta ka danbaysay ayaa ahayd in uu ku guulaysto cayaaryahanada ka mid noqon doono xulka dalkiisa.

Magacyadaas ayaa waxaa ka dhex muuqday cayaaryahano aan weligood u safan qaranka Ingriiska sida cayaar yahanka lagu magacaabo Curtis Davies, oo ah cayaar yahan difaac ah una safta naadiga Aston Villa. Halka uu ka tagay David Beckham iyo goolhayihii kooxda Tottenham Paul Robinson asagoo u aaneeyay in aynan cayaar yahanadaas hada cayaarin cayaaro ku filan oo uu ku dooran karay.

Macalinka cusub ee Ingriiska wuxuu u sheegay cayaaryahanada uu hada ka tagay iyo kuwa aan weligood horay loo magacaabin in irduhu u furan yihiin balse ay u suurtoobi wayday in uu kuligood cayaartaan magacaabo.