CAYAAR BAROOR DIIQ AH OO LAGU XUSAYAY FAARAX SINTIKO OO LAGU QABTAY GOBOLKA HIIRAAN

16 December 2008

Ciyaar xushmo ah, oo lagu xusayay Alle ha u naxariistee marxuun Faarax sintiko oo ah nin caan ku ahaa ciyaaraha soomaaliya ayaa lagu qabta Magaalada B/weyne ee xarunta Gobolka Hiiraan. Ciyaartaan oo baroor diiq ahayd ayaa waxaa ka qeyb qaatay labo kooxood oo kala matalayay Degmooyinka B/weyne iyo Bulo-burte ee Gobolkan Hiiraan.

Kooxda Alpa B.weyne

Kooxda Elman Bulo-burte

Ciyaartan oo ay qaban qaabadeeda iska kaashadeen Gudiga Olompikada Gobolka Hiiraan oo uu hor kacayay C/laahi Cabdi Xasan (C/laahi Bay) iyo Ururka Hormarita Dhalinyarada iyo Isbortiga ee Gobolka Hiiraan ayaa waxaa ay ka dhaceen garoonka kubada cagta ee Lama-galaay ee magaalada B/weyne, waxaana u soo daawasho tagay boqolaal dad ah oo xiiseeyo ciyaarta k/cagta.

Gudiga qaban qaabada ciyaarta

Daawadayaasha cayaarta

Intii ciyaartu aysan bilaaban ayaa gudoomiye C/laahi Bay, waxaa uu ciyaartoydii labada koox iyo maamulayaasha kooxaha iyo sidoo kale dhamaan dadweynihii u soo daawasho tagay u soo jeediyay qudbad aad u dheereed oo uu kaga hadlayay marxuun Faarax Sindiko, taariiqdiisii iyo guulihii uu u soo hooyay bahweyta Soomaaliyeed, sidoo kale waxaa uu carabka mariyay Gudoomiye C/laahi Bay isbortiga Gobolkan Hiiraan iyo sida uu u baaba’ay waxaana uu tilmaamay in wax badan uu ka qaban doono mudooyinka soo socdo.

Labadan koox ee kala matalayay degmooyinka B/weyne iyo Bulo-burte oo la kala oranayay Alpo iyo Elman ayaa markii ay ciyaarta bilaawatay dardar iyo ciyaar xirfadeysan oo herkeedu aad u sareeyo la soo galay garoonka islamrakaan dadkii usoo daawasho tagay qiiro iyo xamaasad galisay.

Goolka waxaa billaabay kooxda Alpa waxaana u dhaliyey Weerar yahayka kooxda Alpa u qaato lambarka 9-aad, wuxuuna dhaliyey daqiiqaddii 30-aad ee qaybtii hore.

Waxaa labeeyey Saadaq, oo Alpa usito lambarka 11-aad. Qaybtii labaad daqiiqaddii 65aad. Waxaa saddaxeeyey Abatey oo isna sito lambarka14-aad ee kooxda Alpa qaybtii labaad daqiiqaddii 80-aad. Halka goolka yatiinka ah ee ay dhalisay kooxda Elman-na qaybtii labaad daqiiqaddii 70-aad uu u dhaliyey laacibka la yiraahdo Jaaraay oo u sitay lambarka 7-aad.

Sidoo kale Elman waxay heshay Rigoore Qaybtii 2aad daqiiqaddii 60-aad, waa ayna iska beerdareeyeen oo ay ka faa’idaysan waayeen. Guud ahaan ciyaartii waxay ku soo gaba gabowday Albo B/weyne 3 -1 Elman Bulo-burte, halkaasna koobkii tacsida marxuun Faarax Sindiko ku guuleystay kooxda Albo B/weyne.

Ilyaas Axmed Cilmi
guute@kubadda.com
xafiiska kubadda.com
Hiiraan B/weyne