SHIR SANADEEDKII URURKA SEUKI OO SI HABSAMI LEH SANADKAAN UGA DHACAY MAGAALADA LONDON

22 April 2008

Shir sanadeedkii ururka Somaliska Europiska Ungdom Kultur och idrott ee marka la soo gaabiyo loo yaqaan SEUKI ayaa sanadkaan ka dhacay dalka Ingriiska xaafada Harlesden ee magaalada London asagoo shirkaasi sanadkaan u dhacay si aan horay loo arag loona maqal, kaas oo kulmiyey dhamaan bahweeynta Sportiga deggan magaalada London iyo waliba agagaarkeeda.

Maamulka iyo asxaabta ka soo qaybgashay xafladda

Shirkan ayaa waxaa qabanqabaadiisa si wada jir ah uga qeyb qaatay xubno ka tirsan ururka SEUKI ee reer London iyo waliba kooxaha ka cayaara cayaaraha xagaaga ee degan magaalada London, iyadoo uu guddigan qabanqaabada guddoomiye u ahaa Sheekh Mukhtaar Shuute, ayna ka mid ahaayeen xubnahaas xafladdan quruxda badan soo agaasimay Maxamed Cali Weerow, Bile Cali Xamaal, Axmed Bile, Maxamed Khaliif, Daahir Gacameey, Cabdirisaaq Seef, Macallin Zakariya, Xarbi Cali iyo Xasan Dhuudhi.

Wafuuda ka kala soctay kooxaha iyo waliba guddiga SEUKI ayaa waxeey degnaayeen HotelIbis oo garabka ku haya Garoonka weyn ee caanka ah ee Wembley Stadium. Balse tirada dadka lagu casuumay shirka oo aad u badneyd aawgeed ayaa guddiga qabanqaabadu waxeey xafladda u wareejiyeen Restaurant weyn oo ku yaal xaafadda Harlesden oo ku dhaw xaafadda Wembley.

Shirkan oo uu xiriirinayey Mr. Sola oo ah wariyaha Barnaamijka Sportiga Telefishinka Afka Soomaaliga ku hadla ee Universal TV. Xafladda ayaa waxaa markii ugu horeeysay lagu furay aayadaha quraanka iyadoo ka dibna lagu soo dhaweeyey makirafonka shirgudoonka shirkan, islamarkaana ahaa guddoomiyaha guddiga qabanqaabada shirka Sheekh Mukhtaar Shuute isagoo halkaana u mahad noqay kuna soo dhaweeyey dhamaan marti sharafta ka soo qeyb gashay shirkan oo ay u dhamaayeen odayaashii iyo cayaartooydii hore kuwooda ugu magaca dheeraa dalkeenii.

Soo dhaweeyntaa ka dib ayaa waxaa islamarkiiba la qeybiyey cuno fudud oo ay shaqaalaha Restaurant-iga weyn ee shirku ka dhacayey ugu talagaleen ilaa iyo100-ka ruux ee marti sharafta ahayd ee lagu soo casuumay shirsanadeedkan SEUKI.

Gudoomiyaha ururka SEUKI Cabdi Cumar Afrax oo lagu soo dhaweeyay micraphonka

Markii cashadii fududeeyd iyo salaadii maqrib laga soo laabatay ayaa wariye Sola waxaa uu mar kale Mikrofonka ku soo dhaweeyey Guddoomiyaha ururka SEUKI Cabdi Cumar Afrax, oo ka war bixiyey waxqabadkii ururka SEUKI intii uu dhisnaa iyo waxyaabaha uu mustaqbalka tiigsanayo ururku, isagoo halkaana uga mahad celiyeye marti sharaftii ka soo qeyb gashay kulankan iyo waliba xubnihii sidan qaabeeysan u soo abaabulay xafladda.

Shirkan ayaa sidoo kale waxaa lagu dhameeystiray heshiis ay hore labada urur ee SEUKI iyo EUROSOM ku kala saxiixdeen magaalada Leicester kaasoo ka koobnaa lix qodob, oo qodab ka mid ah uu ahaa in la abuuro guddi farsamo oo ka socda labada urur si ay u soo xulaan cayaartooyda ka cayaarta labada tartan guddigaas oo haatan la magacaabay, waxaana dhanka SEUKI u matalaya guddigaas 1- Sheekh Mukhtaar Shuute 2- Daahir Cusman Faarax (Gacameey) iyo Bile Cali Xamaali, halka ururka EuroSom ay matalayaan 1- Macallin Bashiir Cabdi Daahir 2- Sabiriye Gaabow iyo 3 -Yuusuf Maxamed Cabdi.

Shirkan ayaa waxaa hadalo aad u qiireysan ka jeediyey halyeey Maxamed Ismaaciil Cali oo aad ku wada xasuusataan koxdii Horseed iyo xulka Qaranka Soomaliya isagoo carabka ku dhuftay in dabka ka holcaya Sportiga magaalada Stockholm ay baasiin ku shubayaan dad tiro yar oo reer London ah isagoo aad ugu celceliyey in inta yar ee hormarka Sportiga hortaagan la iska qabto.

Waxaa sidoo kale hadalo wanaagsan halkaa ka soo jeediyey Guddoomiye ku xigeenka GOS Mudane Duran Axmed Faarax oo halkaa ka soo jeediyey hadalo guubaabo ah oo ku socda dhamaan bahda Sportiga dalkeena sidoo kale waxaa isna hadalo ku saabsan wada shaqeeynta labada urur ee SEUKI iyo EuroSom halkaa ka soo jeediyey Guddoomiyaha urur EuroSom Maxamed Diini, waxaa kaloo halkaa hadalo qiimo leh ka soo jeediyey Macallin Shiino Guhaad, Yaasin Maxamed Bulsho , Abdulqadir Xuseen Isoomareey , Axmed Cilmi Faarax, Cabdulqadir Maxamed Farax Birirq, Shuceeyb Jumcaale Barre iyo Abuukar Cali.

hablihii kubadda kolayga u cayaari jiray dalkeena

Sidoo kale waxaa halkaa ka hadlay qaar ka mid ah hablihii kubadda kolayga u cayaari jiray dalkeenii oo ay goobjoog ka ahaayeen Bakiin Maaxi, Diib Cabdi Jaamac, Shukri Dhalbaas, Miski iyo qaar kaloo badan o aan halkan ku soo koobi karin.

Xafladdan quruxda badan oo aad dhawaan ka daawan doontaan Universal TV ayaa waxaa lagu dhameeystiray qorituurkii sanadkan 2008 ka dhacaya magaalada Stockholm oo waliba sanadkan cayaaraha SEUKI ay u ciidayaan 10 guuradii cayaaraha xagaaga ka dhaca magaalada Stockholm, maadaama uu fikirka qabashada cayaarahan lahaa halyeey Cawad Xasan oo ka tirsan ururka SEUKI iyo waliba qaar ka tirsan kooxaha ka cayaara, cayaaraha ay qabtaan ururka SEUKI oo ka mid ahaa kuwii soo bilaabay ayaa wuxuu ururka SEUKI sanadkan si gaar ah u xusi doonaa 10 guurada cayaaraha xagaaga Stockholm.

Waxaa sidoo kale halkaa hadal gaaban ka soo jeediyey Guddoomiya kooxada Xiddigaha Rågsved oo ku hadlayeye magaca kooxaha maadama ay soo wakiisheen isagoo ka hadlay hormarka degdegga ah ee ay cayaarahan xagaaga SEUKI gaareen iyo sida ay hore ugu socdaan.

Shirkan ayaa waxaa goobjoog ka ahaa nin ka mid ah kuwa Adduunka ugu dheer oo dhalashadiisu tahay Somali, laguna magacaabo Xuseen Bissad oo halkaa isagana fikirkiisa ka dhiibtay kaas oo soo jeediyey hadalo gubaabo ah , sidoo kale waxaa xafladdan goob joog ka ahaa websiteyada kala ah Kubadda.com, Somali Sport iyo Markacadey.net.

Ururka SEUKI ayaa wuxuu mahad ballaran u dirayaa dhamaan bahdii Sportiga ee ka soo qeybgashay shirkan gaar ahaan Bashiir Mursal, Mr Sola , Maxamed Buube iyo dhamaan inta gacanta ka geeysatay bilicsamida xafladdan.

Isku aadkii tartanka ayaa wuxuu noqday sida hoos ku xusan:

Group A		Group B		Group C
Swisserland		Sokao Bergan		Midnimo (Göte)
Leicetare		Sonpet (Fin)		Ilamos
Olympic Danmark		Tillbrug ( Holland )		Qaran
Xiddigaha Rågsved		London Star		Streatham

Gabagabadii shirkan ayaa waxaa hadal gaaban ka soo jeediye Cali Nuur Garaash, oo ka tirsan odayaasha Sportiga magaalada Stockholm isagoo halkaa ka sheegay sida uu ula dhacay shirkan quruxda badan isla markaana wuxuu sheegay in qorituurku uu u dhacay si cadaalada ah oo ay koox walba ku qanacsan tahay.

Mohamed Sh Nuur
admin@ceelbuurnet.com